ⵙ ⵜⵎⵍⴷⴰ ⵏ ⵉⵎⴰⵍⴰⵙⵙ ⵏ ⵜⵎⵓⵔⴰ ⵉⵎⵓⵏⵏ ⵏ ⵉⵙⴰⵖⵓⵍⵏ ⵉⵕⵥⵎⵏ 2026, ⵍⵍⵉ ⵉⵜⵜⵡⴰⴳⵏ ⴳ ⵓⵙⵖⵉⵎ ⵏ ⵜⵎⵓⵔⴰ ⵉⵎⵓⵏⵏ ⴳ ⵏⵢⵓⵢⵓⵕⴽ, ⵜⴷⵔⴰ ⵎⴰⵙⵙⴰ ⴰⵎⴰⵍ ⵍⴼⵍⵍⴰⵃ ⵙⵙⵖⵔⵓⵛⵛⵏⵉ ⴳ ⵜⴳⵉⵡⵉⵔⵜ ⵏ ⵓⵏⵏⵓⵕⵥⵎ ⵉⵥⵍⵉⵏ ⵉ ⵜⵉⵍⴰⵍⵜ ⵏ ⵉⵙⵖⵉⵡⵉⵙⵏ ⵎⵉ ⵉⵕⵥⵎ ⵓⵙⴰⵖⵓⵍ ⴳ ⵓⵙⴷⵓⵙ ⵏ ⵡⴰⴱⴰⴹ ⴰⵎⵓⵟⵟⵓⵏ ⴷ ⵜⵙⵉⵎⴰⵏⵜ ⵜⴰⵙⵜⵔⴰⵜⵉⵊⵉⵢⵜ

26 June 2026

ⵙ ⵜⵎⵍⴷⴰ ⵏ ⵉⵎⴰⵍⴰⵙⵙ ⵏ ⵜⵎⵓⵔⴰ ⵉⵎⵓⵏⵏ ⵏ ⵉⵙⴰⵖⵓⵍⵏ ⵉⵕⵥⵎⵏ 2026, ⵍⵍⵉ ⵉⵜⵜⵡⴰⴳⵏ ⴳ ⵓⵙⵖⵉⵎ ⵏ ⵜⵎⵓⵔⴰ ⵉⵎⵓⵏⵏ ⴳ ⵏⵢⵓⵢⵓⵕⴽ, ⵜⴷⵔⴰ ⵎⴰⵙⵙⴰ ⴰⵎⴰⵍ ⵍⴼⵍⵍⴰⵃ ⵙⵙⵖⵔⵓⵛⵛⵏⵉ, ⵜⴰⵎⴰⵡⵙⴰⵙⵜ ⵜⴰⵎⴰⵍⴰⵍⵜ ⴷⴰⵔ ⵓⵏⵙⵙⵉⵅⴼ ⵏ ⵜⵏⴱⴰⴹⵜ ⵉⵜⵜⵓⵙⵎⴰⴳⵍⵏ ⵙ ⵓⵎⵓⵜⵜⵉ ⴰⵎⵓⵟⵟⵓⵏ ⴷ ⵓⵙⵏⴰⵎ ⵏ ⵜⵎⵙⵙⵓⴳⵓⵔⵜ, ⴳ ⵜⴳⵉⵡⵔⵜ ⵏ ⵓⵏⵏⵓⵕⵥⵎ ⵉⵜⵜⵓⵥⵍⴰⵢⵏ ⵉ ⵜⵉⵍⴰⵍⵜ ⵏ ⵉⵙⵖⵉⵡⵙⵏ ⵎⵉ ⵉⵕⵥⵎ ⵓⵙⴰⵖⵓⵍ ⴳ ⵓⵙⴷⵓⵙ ⵏ ⵡⴰⴱⴰⴹ ⴰⵎⵓⵟⵟⵓⵏ ⴷ ⵜⵙⵉⵎⴰⵏⵜ ⵜⴰⵙⵜⵔⴰⵜⵉⵊⵉⵢⵜ ⴷ ⵉⵖⵉⵎⵉ ⵏ ⵜⵎⵓⵛⴰ ⵜⵉⵏⴰⴷⴷⴰⵡⵉⵏ ⵜⵉⵎⵓⵟⵟⵓⵏⵉ.

ⴳ ⵜⴽⵛⵛⵓⵎⵜ ⵏⵏⵙ, ⵜⵙⴷⴷⵉⴷ ⵎⴰⵙⵙ ⵜⴰⵎⴰⵡⵙⴰⵙⵜ ⴰⵔ ⵜⵜⴳⴳⴰⵏⵜ ⴷⵖⵉ ⵜⵉⴽⵏⵓⵍⵓⵊⵉⵢⵉⵏ ⵜⵓⵚⴽⴰ ⵏ ⵜⵎⵙⵙⵓⴳⴰⵔ ⵜⵉⴳⴷⵓⴷⴰⵏⵉⵏ ⴷ ⵜⵎⵓⵛⴰ ⵜⵉⴷⴷⴰⵡⵉⵏ ⵉⵜⵜⵎⵓⵙⵙⵓⵏ, ⴷ ⵉⵊⵎⵉⵍⵏ ⵉⴳⴷⵓⴷⴰⵏⵏ ⵓⵍⴰ ⵜⴰⵎⵣⵉⵣⵡⵔⵜ ⵜⴰⴷⵎⵙⴰⵏⵜ, ⵎⴽⵏⵏⴰ ⵜⴳⴰ ⵢⴰⵏ ⵓⴼⵔⴷⵉⵙ ⴰⴷⵙⵍⴰⵏ ⴳ ⵉⵙⴷⵓⵙ ⵏ ⵡⴰⴱⴰⴹ ⵏ ⵉⵡⴰⵏⴽⵏ. ⵜⵙⴷⴷⵉⴷ ⵙ ⵓⴳⴰⵜⵉ ⴰⴷ ⵅⴼ ⵜⵎⵔⵉⵙⵜ ⵏ ⵓⵣⵣⴳⵉⵔ ⵏ ⵓⵎⵢⴰⵙ ⵉⵏⴳⵔ ⵓⵏⵏⵓⵕⵥⵎ ⵅⴼ ⵉⵙⵍⵍⵡⵉ ⴰⵎⴰⴹⵍⴰⵏ ⴷ ⵓⴼⵔⴰⴳ ⵏ ⵡⴰⴱⴰⴹ ⴳ ⵉⵙⵜⴰⵢⵏ ⵉⵜⵉⴽⵏⵓⵍⵓⵊⵉⵢⵏ ⵉⵏⴰⵎⵓⵔⵏ.

ⵜⵙⴼⴰⵡ ⵎⴰⵙⵙⴰ ⵜⴰⵎⴰⵡⵙⴰⵙⵜ ⵎⴰⵙ ⴷ ⵜⴷⴷⴰ ⵜⴰⵏⵏⴰⵢⵜ ⴰⴷ ⵜⴰⵙⵜⵔⴰⵜⵉⵊⵉⵜ ⴳ ⵓⵙⴰⵜⵉ ⵏ ⵉⵙⵡⴰⵍⴰⵜⵏ ⵢⴰⵜⵜⵓⵢⵏ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴰⴷ ⵡⵉⵙ ⵚⴹⵉⵚⴰⴷ ⵜ ⵉⵙⵏⵔⵓ ⵕⴱⴱⵉ, ⵍⵍⵉ ⵉⴳⴰⵏ ⵣⴳ ⵜⵉⵖⵉⵙⵜ ⵜⴰⵙⵎⴳⵓⵔⵜ ⴷ ⵜⵉⴽⵏⵓⵍⵓⵊⵢⵉⵏ ⵉⵜⵜⵅⵉⵜⵉⵔⵏ ⴷ ⵓⵙⵏⴼⵍ ⴰⵎⵓⵟⵟⵓⵏ ⵢⴰⵜ ⵏ ⵜⵎⵙⵙⵉⵍⵉⵜ ⵜⴰⴷⵙⵍⴰⵏⵜ ⵏ ⵜⴳⵎⵉ ⵜⴰⴷⵙⵍⴰⵏⵜ ⴷ ⵜⵏⴰⵎⵓⵏⵜ ⴷ ⵜⵏⴼⴳⴰⵏⵜ ⵏ ⵜⴳⵍⴷⵉⵜ.

ⵜⴼⵙⵔ ⵎⴰⵙⵙⴰ ⵜⴰⵎⴰⵡⵙⴰⵙⵜ ⵜⴰⵏⵏⴰⵢⵜ ⵜⴰⵎⵖⵔⵉⴱⵉⵜ ⴳ ⵡⵉⵏⵏⴰ ⵎⵉ ⵜⵜⵉⵏⵉ “ⴰⴱⵔⵉⴷ ⴰⵎⵓⵟⵟⵓⵏ ⵡⵉⵙ ⴽⵕⴰⴹ”, ⵍⵍⵉ ⵉⴱⴷⴷⴰⵏ ⵅⴼ ⵓⵣⵣⴳⵉⵔ ⵏ ⵓⵎⵢⴰⵙ ⵉⵏⴳⵔ ⵓⵏⵏⵓⵕⵥⵎ ⴰⴳⵔⴰⵖⵍⴰⵏ ⴷ ⵜⵏⵏⵓⴱⴹⴰ ⵜⴰⵏⴰⵎⵓⵔⵜ, ⵙ ⵓⵙⴱⵖⵔ ⵣⴳ ⵉⵏⵎⵎⴰⵍⵏ ⵉⴳⵔⴰⵖⵍⴰⵏⵏ, ⴷ ⵜⵓⵚⴽⴰ ⵏ ⵜⴷⵔⴰⵡⵉⵏ ⵜⵉⵜⵉⴽⵏⵓⵍⵓⵊⵉⵢⵉⵏ ⴷ ⵡⴰⴷⴰⴼ ⵖⵔ ⵉⵙⵍⵍⵡⵉⵜⵏ ⵉⵎⵓⴼⴰⵢⵏ, ⴰⴽⴷ ⵓⴹⴰⴽⴰⵍ ⵏ ⵓⵣⵔⴰⴽ ⵏ ⵓⵙⴰⵜⵉ ⵓⵍⴳⵉⵏ ⴰⵏⴰⵎⵓⵔ, ⴷ ⵜⵓⵜⵍⴰⵢⵉⵏ ⵜⵉⵏⴰⵎⵓⵔⵉⵏ, ⴷ ⵜⵥⵍⴰⵢⵉⵏ ⵜⵉⴷⵍⵙⴰⵏⵉⵏ ⴷ ⵡⴰⵙⵙⴰⵔⵏ ⵏ ⵉⵏⵎⵓⵔⴰⵏ ⴷ ⵜⵏⵓⴼⴰ ⵜⵉⵙⵜⵔⴰⵜⵉⵊⵢⵉⵏ ⵏ ⵜⴳⵍⴷⵉⵜ.

ⵎⴽⵏⵏⴰ ⵜⵙⴷⴷⵉⴷ ⵎⴰⵙⵙⴰ ⵜⴰⵎⴰⵡⵙⴰⵙⵜ ⵎⴰⵙ ⴳⴰⵏ ⵉⵙⵖⴰⵡⵙⵉⵡⵏ ⵎⵉ ⵕⵥⵎⵏ ⵉⵙⴰⵖⵓⵍⵏ ⵢⴰⵜ ⵜⵔⵙⵍⵜ ⵜⴰⴷⵙⵍⴰⵏⵜ ⴳ ⵜⴰⵏⵏⴰⵢⵜ ⴰⴷ, ⵙ ⵡⵉⵍⵍⵉ ⴳⵉⵙ ⵏ ⵜⵙⵓⵙⵖⵜ ⴷ ⵓⵙⵡⵓⵔⵉ ⴷ ⵜⵥⴹⴰⵕⵜ ⵏ ⵓⵏⵖⴰⴷ, ⴷ ⵜⵥⴹⴰⵕⵜ ⵏ ⵓⵏⵎⴳⴰⵍ ⵏ ⵏ ⵉⵙⵜⴰⵢⵏ ⵉⵜⵉⴽⵏⵓⵍⵓⵊⵉⵢⵏ ⵓⵍⴰ ⴰⵙⵉⵥⴹⵕ ⵏ ⵜⵎⵙⵙⵓⴳⴰⵔ ⴰⴷ ⵔⵎⵙⵏⵜ ⵜⵉⵜⵉⵇⵏⵉⵢⵉⵏ ⵍⵍⵉ ⵜⵙⵎⵔⴰⵙ ⴷ ⵜⵏⴰⵎⵉⵜⵜ ⴷ ⵜⴼⵍⵙⵜ ⴷ ⵓⵙⴱⵓⵖⵍⵓ ⵏⵏⵙⵏⵜ ⵙ ⵜⵖⴰⵔⴰⵙⵜ ⵜⴰⵙⵓⵍⴰⵏⵜ.

ⴰⵎⵎⴰⵙ ⵏ ⵡⴰⵡⴰⵍ ⵏⵏⵙ ⵅⴼ ⵜⵉⵖⵉⵙⵜ ⵜⴰⵙⵎⴳⵓⵔⵜ, ⵜⵙⴼⴰⵡ ⵎⴰⵙ ⴰⵔ ⵉⵙⵡⵓⵔⵓⵢ ⵍⵎⵖⵔⵉⴱ ⵅⴼ ⵓⵙⴱⵓⵖⵍⵓ ⵏ ⵉⵎⴷⵢⴰⵜⵏ ⵉⵙⴰⴷⵎⴰⵔⵏ ⵉ ⵜⵥⵍⴰⵢⵉⵏ ⵏⵏⵙ ⵜⵉⵏⴰⵎⵓⵔⵉⵏ, ⵍⵓⵎⵏⵏ ⴳ ⵎⴰⴷ ⵉⵥⵍⵉⵏ ⵙ ⵜⵓⵜⵍⴰⵢⵜ ⵜⴰⵄⵕⴰⴱⵜ ⴷ ⴷⴷⴰⵔⵉⵊⴰ ⵜⴰⵎⵖⵔⵉⴱⵉⵜ ⴷ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ, ⵜⴰⵎⴰ ⵏ ⵓⵙⴱⵓⵖⵍⵓ ⵏ ⵉⴼⵙⴰⵢⵏ ⵉⵎ1ⵣⵍⴰⵢⵏ ⵉⵙⴰⴷⵎⴰⵔⵏ ⵉ ⵡⴰⵙⵙⴰⵔⵏ ⵏ ⵉⴳⵔⴰⵏ ⵉⵙⵜⵔⴰⵜⵉⵊⵉⵢⵏ, ⵣⴳ ⴳⵉⵙⵏ ⵜⴰⵎⵙⵙⵓⴳⵓⵔⵜ ⵜⴰⴳⴷⵓⴷⴰⵏⵜ, ⴷ ⵜⴷⵓⵙⵉ ⴷ ⵓⵙⵍⵎⴷ ⴷ ⵜⴼⵍⵍⴰⵃⵜ ⴷ ⵜⵣⵔⴼⵜ ⴷ ⵓⵙⵡⵓⴷⴷⵓ ⵏ ⵉⵙⵓⴳⴰⵎ ⵏ ⵡⴰⵎⴰⵏ ⴷ ⵜⵏⴼⵔⵓⵜ ⵜⴰⵙⵉⴱⵉⵔⴰⵏⵉⵜ.

ⵎⴽⵏⵏⴰ ⵜⵙⴼⴰⵡ ⵛⵉⴳⴰⵏ ⵏ ⵜⵙⵏⵜⴰⵢⵉⵏ ⵏ ⵓⵥⵟⵟⴰ ⵍⵍⵉ ⵉⵕⵥⵎ ⵍⵎⵖⵔⵉⴱ ⴳ ⵓⵙⴰⵜⵉ ⵏ ⵜⵙⵜⵔⴰⵜⵉⵊⵉⵢⵜ ⵏ “ⵍⵎⵖⵔⵉⴱ ⴰⵎⵓⵟⵟⵓⵏ 2030” ⴷ ⵜⴽⴰⵕⴹⴰ ⵏ ⵓⴱⵔⵉⴷ “AI Made in Morocco” ⴷⵉⴽⵙ ⵜⴰⵥⵕⵉⴳⵜ ⵏ ⵓⵙⵉⵏⴰⴳ ⵏ JAZARI ⴳ ⵙⵉⵏ ⴷ ⵎⵔⴰⵡⵜ ⵏ ⵜⵎⵏⴰⴹⵉⵏ ⵏ ⵜⴳⵍⴷⵉⵜ, ⴷ ⵓⵙⵔⵓⵙ ⵏ ⵓⵙⴰⵔⵎ ⴰⵏⵊⵎⵓ ⴰⴽⴷ Mistral AI ⵉⵥⵍⵉⵏ ⵙ ⵓⵔⵣⵣⵓ ⵓⵙⵏⵉⵙ ⴷ ⵓⵙⵉⵜⵜⵉ ⵏ ⵜⵥⴹⴰⵕⵉⵏ ⴷ ⵓⵙⴱⵓⵖⵍⵓ ⴰⵏⵊⵎⵓ ⵏ ⵉⵎⴷⵢⴰⵜⵏ ⵏ ⵜⵉⵖⵉⵙⵜ ⵜⴰⵙⵎⴳⵓⵔⵜ ⵓⵍⴰ ⴰⵙⵙⴰⵔⵓ ⴳ ⵜⵓⵚⴽⴰ ⵜⴰⵏⴰⴷⴷⴰⵡⵜ ⵜⴰⵎⵓⵟⵟⵓⵏⵜ ⵉⴱⴰⴹⵏ.

ⵜⵙⴷⴷⵉⴷ ⵎⴰⵙⵙⴰ ⵜⴰⵎⴰⵡⵙⴰⵙⵜ ⴰⵡⴷ ⵎⴰⵙ ⴰⵔ ⵜⵜⴱⴷⴷⴰⵏⵜ ⵜⵉⵔⴰⵜⵉⵏ ⴰⴷ ⵅⴼ ⵓⵙⵙⴰⵔⵓ ⴰⵅⴰⵜⴰⵔ ⵏ ⵓⴷⴳⴰⵔ ⴰⵏⴼⴳⴰⵏ, ⵙ ⵓⵙⵎⵓⵜⵜⴳ ⵏ 100 ⵏ ⵉⴼⴹ ⵏ ⵉⵏⴱⵖⵓⵔⵏ ⵉⵎⵓⵟⵟⵓⵏⵏ ⴽⵓ ⴰⵙⴳⴳⵯⴰⵙ ⴰⵔ 2030, ⵓⵍⴰ ⴰⵙⴷⵓⵙ ⵏ ⵜⵥⴹⴰⵕⵉⵏ ⴳ ⵢⵉⴳⵔ ⵏ ⵡⴰⵎⵎⴰⵙⵏ ⵏ ⵜⵎⵓⵛⴰ ⴷ ⵜⵎⵙⵙⵓⴷⵙⵜ ⵏ ⵓⴽⵍⴰⵡⴷ ⴳ ⵉⵍⵍⴰ ⵡⴰⴱⴰⴹ ⵓⵍⴰ ⵜⴰⵎⵙⵙⵓⴷⵙⵜ ⵎⵉ ⵢⴰⵜⵜⵓⵢ ⵓⵙⵡⵓⴷⴷⵓ.

ⴳ ⵓⵎⵏⵉⴷ ⴰⴷ ⵏⵉⵜ, ⵜⴼⵙⵔ ⵎⴰⵙⵙⴰ ⵜⴰⵎⴰⵡⵙⴰⵙⵜ ⵜⵉⵎⴳⴳⴰ ⵉⵅⴰⵜⴰⵔⵉⵏ ⵏⵏⴰ ⵉⵜⵜⵓⴳⴰⵏ ⴳ ⵢⵉⴳⵔ ⵏ ⵓⵙⵜⵔⴰⵔ ⵏ ⵜⵎⵙⵙⵓⴳⵓⵔⵜ ⵜⴰⴳⴷⵓⴷⴰⵏⵜ, ⵜⴱⴷⵔ ⵎⴰⵙ ⵜⵣⵣⵔⵉ ⵜⴷⴰⴱⵓⵜ ⵜⴰⵏⴰⵎⵓⵔⵜ ⵏ ⵓⵙⵡⵓⵔⵉ ⴰⵔ ⴷⵖⵉ ⵓⴳⴰⵔ ⵏ 52 ⵎⵍⵢⵓⵏ ⵏ ⵜⵎⵙⵎⵀⵍ, ⵎⴽⵏⵏⴰ ⵍⵍⴰⵏ ⴳ ⵜⴷⴰⴱⵓⵜ ⵏ “ⵉⴷⴰⵔⴰⵜⵉ” ⵡⵓⴳⴰⵔ ⵏ 2450 ⵏ ⵡⴰⵍⵓⴳ ⴰⵎⵙⵙⵓⴳⵓⵔ ⵏ ⵡⵓⴳⴰⵔ ⵏ 130 ⵏ ⵜⵎⵙⵙⵓⴳⵓⵔⵜ ⵜⴰⴳⴷⵓⴷⴰⵏⵜ, ⴰⵢⵍⵍⵉ ⵉⵎⵎⴰⵍⵏ ⴰⵎⵓⵜⵜⵉ ⴰⵣⵣⵉⴳⵣⴰⵏ ⵖⵔ ⵢⴰⵜ ⵜⵎⵙⵙⵓⴳⵓⵔⵜ ⵜⴰⵎⵓⵟⵟⵓⵏⵜ ⵉⵍⵍⴰⵏ ⵅⴼ ⵜⴷⴰⴱⵓⵜⵉⵏ ⵏ ⵉⵊⵎⵉⵍⵏ.

ⵜⵙⵎⴰⵢⵏⵓ ⵎⴰⵙⵙⴰ ⵜⴰⵎⴰⵡⵙⴰⵙⵜ ⴰⵙⴷⴷⵉⴷ ⵏ ⵜⵎⵔⵉⵙⵜ ⵏ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ ⴳ ⵓⵙⴷⵓⵙ ⵏ ⵓⵎⵢⴰⵡⴰⵙ ⴰⴳⵔⴰⵖⵍⴰⵏ ⵏⵏⴰ ⴳ ⵜⵍⵍⴰ ⵜⴱⴹⵉ ⵏ ⵜⵓⵙⵙⵏⴰ ⴷ ⵜⵓⵚⴽⴰ ⵏ ⵜⵥⴹⴰⵕⵉⵏ ⵜⴱⴷⵔ ⴰⵎⵎⴰⵙ ⴰⵙⴳⴰⵡⴰⵏ ⵏ ⵓⵙⵏⴼⵍ ⴰⵎⵓⵟⵟⵓⵏ ⵉ ⵜⴳⵎⵉ ⵜⴰⵙⵓⵍⴰⵏⵜ (D4SD Hub), ⵍⵍⵉ ⵉⵕⵥⵎⵏ ⵙ ⵜⴷⵔⴰⵡⵜ ⵉⵏⴳⵔ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ ⴷ ⵓⵖⴰⵡⴰⵙ ⵏ ⵜⵎⵓⵔⴰ ⵉⵎⵓⵏⵏ ⴰⵏⴳⵎⵓ, ⵙ ⵓⵡⵜⵜⴰⵙ ⵏ ⵓⵙⴷⵔⴼ ⵏ ⵓⵙⴱⵓⵖⵍⵓ ⵏ ⵉⴼⵙⴰⵢⵏ ⵉⵎⵓⵟⵟⵓⵏⵏ ⵉⵕⵥⵎⵏ ⵉ ⵉⴼⵔⵉⵇⵢⴰ ⴷ ⵉⵡⴰⵏⴽⵏ ⴰⵄⵕⴰⴱⵏ.

ⵜⵙⴷⴷⵉⴷ ⵎⴰⵙⵙⴰ ⵜⴰⵎⴰⵡⵙⴰⵙⵜ ⵎⴰⵙ ⵉⵔⴰ ⵍⵎⵖⵔⵉⴱ ⴰⴷ ⵉⴹⴼⵓⵕ ⴰⵙⵡⵓⴷⴷⵓ ⵏ ⵜⵉⵍⴰⵍⵜ ⵏⵏⵙ ⴳ ⵓⵣⴷⴰⵢ ⵉⵏⴳⵔ ⵉⴼⵔⵉⵇⵢⴰ ⴷ ⵓⵎⴰⴹⴰⵍ ⴰⵄⵕⴰⴱ ⴷ ⵓⵕⵓⴱⴱⴰ ⵓⵍⴰ ⴰⵙⴰⵢⵔⴰⵔ ⴰⵟⵍⴰⵙⵉ, ⵙ ⵓⵚⵕⵚⵚⵓ ⵏ ⵜⴰⵏⵏⴰⵢⵜ ⵍⵍⵉ ⵉⵜⵜⴳⴳⴰⵏ ⴰⵏⵏⵓⵕⵥⵎ ⴰⵜⵉⴽⵏⵓⵍⵓⵊⵉ ⴷ ⵡⴰⴱⴰⴹ ⴰⵎⵓⵟⵟⵓⵏ ⴷ ⵜⵎⵢⵉⵎⴰⵏⵜ ⴷ ⵜⵥⴹⴰⵕⵜ ⵏ ⵜⴰⵙⵓⵍⵜ ⴷ ⵓⵎⵢⴰⵡⴰⵙ ⴰⴳⵔⴰⵖⵍⴰⵏ, ⴷ ⵉⴼⵔⴷⵉⵙⵏ ⵉⵏⵙⵎⴰⴷⵏ ⴳ ⵓⵊⵎⵉⵍ ⵏ ⵜⴳⵎⵉ ⵜⴰⵎⵓⵟⵟⵓⵏⵜ ⵜⴰⵙⵓⵍⴰⵏⵜ.

A+ A-

You may be interested in

ⵜⵉⵙⵎⵉⴳⴰⵍ

ⴰⵎⵣⵔⴰⵢ

ⵜⴰⵎⴰⵡⵙⴰⵙⵜ

You may be interested in

Subscribe to our newsletter